За љубителите на печурки, ова јадење ќе биде вистинско уживање.
Потребно е:
- 500 г шампињони
- 2 главици кромид
- 100 г сланина
- 2 лажици масло
- 2 чешниња лук
- 10 кришки леб
- 250 мл млеко
- 200 мл кисело млеко
- 3 јајца
- мелен сув зачин
- магдонос
- оригано
- сол, бибер
Подготовка:
Шампињоните измијте ги убаво и исецкајте го на листови.
Лукот и кромидот исецкајте ги ситно. Сланината исецкајте ја на тенки ленти.
На загреано масло пропржете го кромидот и сланината и потоа додадете ги сецканите шампињони. Оставете да се динста. По некое време додадете сол, бибер, сецканото лукче, малку оригано, магдонос и мелен сув зачин.
Во намастена огноотпорна тава наредете 5 кришки леб претходно потопени во млеко.
Врз нив распоредете рамномерно половина од филот со печурки. Сега повторно наредете еден ред леб натопен во млеко. Врз него остатокот од филот.
Изматете ги јајцата и во нив додадете го киселото млеко. Измешајте за да добиете хомогена смеса. Оваа течност прелијте ја врз мусаката во тавата и ставете да се пече во претходно загреана рерна на 160 целзиусови степени околу 20 минути.
Мусаката од шампињони оставете малку да се излади, пресечете ја на коцки и послужете ја.